Carta d’identitad
Introducziun dalla nova carta d’identitad biometrica
Naven dils 2 da november 2026 san vischinas e vischins svizzers, sch’els vulan, dumandar la nova carta d’identitad biometrica. Quella vegn extrada el Center da documents d’identitad da Cuera. Cunvegnientscha da termin indispensabla.
A persunas che viageschan enteifer l’UE vegn la carta d’identitad biometrica recumandada. Per persunas che drovan la carta sulettamein sco legitimaziun en Svizra ei la carta d’identitad buca biometrica (carta senza chip) sufficienta. Las cartas d’identitad ch’ein emessas avon l’introducziun dalla nova carta d’identitad biometrica restan valeivlas per viadis ell’UE entochen lur termin da scadenza (maximal diesch onns). Silsuenter vegnan ellas buca pli renconuschidas egl exteriur dall’UE.
Tgi che vul empustar ina carta d’identitad buca biometrica sa sepresentar persunalmein al spurtegl dalla controlla da habitonts, selegitimar cun in document corrispundent e purtar ina fotografia da passaport actuala. Las taxas ein da pagar directamein al spurtegl dalla controlla da habitonts. Persunas minorennas drovan la lubientscha da lur representants legals. La veglia carta d’identitad ei da presentar e da schar svaletar. Sch’in document va a piarder, sa il niev vegnir empustaus pér cura che la polizia dispona d’ina annunzia da perdita corrispundenta.
La carta d’identitad buca biometrica sa medemamein vegnir dumandada tenor cunvegnientscha da termin tier il Center da documents d’identitad da Cuera.
| ID: Taxas e valeivladad | Taxas | Valeivladad | |
| Carschi naven da 18 onns | fr. | 65.–(+Porto) | 10 onns |
| Affons entochen il 18avel onn da vegliadetgn | fr. | 30.–(+Porto) | 5 onns |
Passaport svizzer 10 (passaport electronic)
Naven digl 1. da mars 2010 san il passaport 10, il passaport provisori ed il pachet cumbinau (passaport e carta d’identitad) buca pli vegnir empustai al spurtegl dalla controlla da habitonts, mobein mo pli sur in center da documents d’identitad.
Las petentas ni ils petents ston far ina damonda corrispundenta sur igl internet ni via telefon ad in center da documents d’identitad e secunvegnir davart in termin.
L’adressa da contact dil center da documents d’identitad a Cuera:
Center da documents d’identitad
Gäuggelistrasse 7
7002 Cuera
Tel. +41 81 257 52 20
E-Mail ausweisechur@afm.gr.ch
Cunvegnas da termin ein indispensablas.
Cunvegnas da termin sur igl internet: www.schweizerpass.ch
Ulteriuras informaziuns anfleis Vus sin la pagina d’internet digl uffeci da migraziun e dil dretg civil ni sin la pagina d’internet www.schweizerpass.ch.
Indicaziuns da viadi
Attest d’indigens
Dumandar online sin moda cumadeivla igl attest d’indigens. Registrar online sut www.einheimisch-ausweis.ch sin moda sempla e nuncomplicada. Ils cuosts pigl attest muntan fr. 10.–.